Rishabh Pant ENG Vs IND 3rd Test, Day 5 (Photo Credit: @CrickitbyHT X)

ஜூலை 14, லண்டன் (Sports News): இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு, 5 போட்டிகள் கொண்ட டெஸ்ட் தொடரில் விளையாடி வருகிறது. இத்தொடருக்கு, ஆண்டர்சன் - டெண்டுல்கர் டிராபி (Anderson-Tendulkar Trophy) என பெயரிடப்பட்டுள்ளது. இந்த டெஸ்ட் தொடர், ஜியோ ஹாட்ஸ்டார் (Jio Hotstar) நேரடி ஒளிபரப்பு செய்கிறது. அனைத்து போட்டிகளும், இந்திய நேரப்படி பிற்பகல் 3.30 மணிக்கு தொடங்குகிறது. முதலிரண்டு டெஸ்ட் போட்டிகள் முடிவில், 1-1 என தொடர் சமநிலையில் உள்ளது. இந்நிலையில், ஜூலை 10ஆம் தேதி இங்கிலாந்து - இந்தியா அணிகள் (ENG Vs IND 3rd Test) மோதும் 3வது டெஸ்ட் போட்டி, லண்டனில் உள்ள லார்ட்ஸ் மைதானத்தில் தொடங்கி நடைபெற்று வருகிறது. ENG Vs IND 3rd Test, Day 2: கேஎல் ராகுல் அரைசதம் விளாசல்.. இந்தியா நிதான ஆட்டம்..!

இங்கிலாந்து எதிர் இந்தியா (England Vs India):

இப்போட்டியில், டாஸ் வென்ற இங்கிலாந்து அணியின் கேப்டன் பென் ஸ்டோக்ஸ் முதலில் பேட்டிங்கை தேர்வு செய்தார். அதன்படி, முதலில் களமிறங்கிய இங்கிலாந்து அணி முதல் இன்னிங்ஸில் 387 ரன்களுக்கு ஆல் அவுட் ஆனது. இங்கிலாந்து அணியில் அதிகபட்சமாக ஜோ ரூட் 104, பிரைடன் கார்ஸ் 56, ஜேமி ஸ்மித் 51 ரன்கள் அடித்தனர். இந்தியா சார்பில் அதிகபட்சமாக ஜஸ்பிரித் பும்ரா 5 விக்கெட்களை வீழ்த்தினார். இதனையடுத்து களமிறங்கிய இந்தியா முதல் இன்னிங்ஸில் 387 ரன்களுக்கு ஆல் அவுட் ஆனது. அதிகபட்சமாக கேஎல் ராகுல் 100, ரிஷப் பந்த் 74, ஜடேஜா 72 ரன்கள் அடித்தனர். இங்கிலாந்து சார்பில் அதிகபட்சமாக கிறிஸ் வோக்ஸ் 3 விக்கெட்களை வீழ்த்தினார்.

இந்தியா தடுமாற்றம்:

இதன்பின்னர், 2வது இன்னிங்ஸில் இங்கிலாந்து அணி 192 ரன்களுக்கு ஆல் அவுட் ஆனது. அதிகபட்சமாக ஜோ ரூட் 44 ரன்கள் அடித்தார். இந்தியா சார்பில் வாசிங்டன் சுந்தர் 4 விக்கெட்களை வீழ்த்தினார். இதனையடுத்து 193 ரன்கள் அடித்தால் வெற்றி என்ற இலக்கை நோக்கி துரத்திய இந்திய அணிக்கு 4ஆம் நாள் ஆட்டநேர முடிவில், இந்தியா 4 விக்கெட்களை இழந்து 58 ரன்கள் அடித்திருந்தது. இந்நிலையில், இன்று 5ஆம் நாள் ஆட்டம் தொடங்கியது. கேஎல் ராகுல் 32* ரன்னில் ஆட்டத்தை தொடங்கினார். மறுபுறம், ரிஷப் பந்த் 9 ரன்னில் அவுட்டாகி ஏமாற்றம் அளித்தார். நிதானமாக விளையாடி வந்த கேஎல் ராகுல் 39 ரன்களில் அவுட்டாகி அதிர்ச்சி அளித்தார். 24 ஓவர்களில் இந்தியா 81 ரன்களுக்கு 6 விக்கெட்களை இழந்து தடுமாறி வருகிறது. இந்தியா வெற்றி பெற இன்னும் 112 ரன்கள் தேவைப்படுகிறது.