ENG Vs IND 1st Test, Day 5 (Photo Credit: @Aryaseen5911 X)

ஜூன் 24, லீட்ஸ் (Sports News): இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு, 5 போட்டிகள் கொண்ட டெஸ்ட் தொடரில் விளையாடுகிறது. இங்கிலாந்து - இந்தியா (ENG Vs IND 1st Test) அணிகள் மோதும் முதல் டெஸ்ட் போட்டி, ஜூன் 20ஆம் தேதி லீட்ஸ் மைதானத்தில் தொடங்கியது. இத்தொடருக்கு, ஆண்டர்சன் - டெண்டுல்கர் டிராபி (Anderson-Tendulkar Trophy) என பெயரிடப்பட்டது. இவ்விரு அணிகள் மோதும் 5 போட்டிகள் கொண்ட டெஸ்ட் தொடர், ஜியோ ஹாட்ஸ்டார் (Jio Hotstar) நேரடி ஒளிபரப்பு செய்கிறது. அனைத்து போட்டிகளும், இந்திய நேரப்படி பிற்பகல் 3.30 மணிக்கு தொடங்கும். ENG Vs IND 1st Test, Day 5: இங்கிலாந்து நிலையான ஆட்டம்.. 254 ரன்கள் பின்னிலை..!

இங்கிலாந்து எதிர் இந்தியா (England Vs India):

இப்போட்டியில், டாஸ் வென்ற இங்கிலாந்து அணியின் கேப்டன் பென் ஸ்டோக்ஸ் முதலில் பவுலிங்கை தேர்வு செய்தார். அதன்படி, முதலில் களமிறங்கிய இந்திய அணி முதல் இன்னிங்ஸில் 113 ஓவர்கள் விளையாடி 471 ரன்களுக்கு ஆல் அவுட் ஆனது. அதிகபட்சமாக கேப்டன் சுப்மன் கில் 147, ரிஷப் பந்த் 134, ஜெய்ஸ்வால் 101 ரன்கள் அடித்தனர். இங்கிலாந்து அணி சார்பில் ஜோஸ் டங் மற்றும் பென் ஸ்டோக்ஸ் தலா 4, கார்ஸ் மற்றும் பஷீர் தலா 1 விக்கெட்களை வீழ்த்தினர். இதனையடுத்து களமிறங்கிய இங்கிலாந்து அணி முதல் இன்னிங்ஸில் 100.4 ஓவர்கள் விளையாடி 465 ரன்களுக்கு ஆல் அவுட் ஆனது. அதிகபட்சமாக ஒல்லி போப் 106, ஹரி புரூக் 99, டக்கெட் 62 ரன்கள் அடித்தனர். இந்தியா சார்பில் பும்ரா 5, பிரசித் கிருஷ்ணா 3, சிராஜ் 2 விக்கெட்களை வீழ்த்தினர்.

இங்கிலாந்து வெற்றி:

இதனையடுத்து, 6 ரன்கள் முன்னிலையுடன் இந்தியா 2வது இன்னிங்ஸை தொடங்கியது. இந்தியா 2வது இன்னிங்ஸில் 96 ஓவர்களில் 364 ரன்களுக்கு ஆல் அவுட் ஆனது. அதிகபட்சமாக கேஎல் ராகுல் 137 ரன்கள், ரிஷப் பந்த் 118 ரன்கள் அடித்தனர். இங்கிலாந்து தரப்பில், கார்ஸ் மற்றும் டங் தலா 3 விக்கெட்களும், பஷீர் 2, வோக்ஸ் மற்றும் ஸ்டோக்ஸ் தலா 1 விக்கெட்டையும் வீழ்த்தினர். இதனையடுத்து களமிறங்கிய இங்கிலாந்து அணி 4ஆம் நாள் ஆட்டநேர முடிவில் 6 ஓவர்களில் விக்கெட் இழப்பின்றி 21 ரன்கள் அடித்திருந்தது. இந்நிலையில், இன்று 5ஆம் நாள் ஆட்டம் தொடங்கியது. க்ராலி 65 ரன்கள் மற்றும் பென் டக்கெட் 149 ரன்கள் அடித்து வலுவான தொடக்கம் கொடுத்தனர். இதனையடுத்து வந்த ஒல்லி போப் 8 ரன்னில் அவுட்டானார். கேப்டன் ஸ்டோக்ஸ் 33 ரன்னில் விக்கெட்டை இழந்தார். இறுதியில், ஜோ ரூட் 53* ரன்கள் மற்றும் ஜேமி ஸ்மித் 44* ரன்கள் மூலம் இங்கிலாந்து அணி 5 விக்கெட் வித்தியாசத்தில் அபார வெற்றி பெற்றது.