ZIM Vs NZ 1st Test, Day 2: டெவோன் கான்வே அரைசதம் விளாசல்.. நியூசிலாந்து முன்னிலை..!
ஜிம்பாப்வே எதிர் நியூசிலாந்து அணிகள் மோதும் முதலாவது டெஸ்ட் போட்டியின், 2ஆம் நாள் மதிய உணவு இடைவேளை வரை நியூசிலாந்து அணி 3 விக்கெட்களை இழந்து 174 ரன்கள் அடித்துள்ளது.
ஜூலை 31, புலவாயோ (Sports News): நியூசிலாந்து கிரிக்கெட் அணி ஜிம்பாப்வேவில் சுற்றுப்பயணம் மேற்கொண்டு, 2 போட்டிகள் கொண்ட டெஸ்ட் (ZIM Vs NZ) தொடரில் விளையாடி வருகிறது. இத்தொடர் இந்திய நேரப்படி மதியம் 1.30 மணிக்கு ஆரம்பமாகும். இவ்விரு அணிகளுக்கும் இடையேயான முதல் டெஸ்ட் போட்டி இன்று (ஜூலை 30) புலவாயோவில் தொடங்கியது. நியூசிலாந்து அணியில் கேன் வில்லியம்சன், கிளென் பிலிப்ஸ் ஆகியோருக்கு பதிலாக மேத்யூ ஃபிஷர் மற்றும் மைக்கேல் பிரேஸ்வெல் அணியில் சேர்க்கப்பட்டனர். காயம் காரணமாக நியூசிலாந்து கேப்டன் டாம் லாதம் முதல் டெஸ்டில் இருந்து விலகினார். ZIM Vs NZ 1st Test, Day 1: 149 ரன்களுக்கு சுருண்டது ஜிம்பாப்வே.. நியூசிலாந்து அணி அபாரம்..!
ஜிம்பாப்வே எதிர் நியூசிலாந்து (Zimbabwe Vs New Zealand):
இந்நிலையில், கிரேக் எர்வின் தலைமையிலான ஜிம்பாப்வே அணி, மிட்செல் சான்ட்னர் தலைமையிலான நியூசிலாந்து அணியை எதிர்கொள்கிறது. இப்போட்டியில், டாஸ் வென்ற ஜிம்பாப்வே அணியின் கேப்டன் கிரேக் எர்வின் முதலில் பேட்டிங்கை தேர்வு செய்தார். அதன்படி, முதலில் களமிறங்கிய ஜிம்பாப்வே அணி முதல் இன்னிங்ஸில் 149 ரன்களுக்கு ஆல் அவுட் ஆனது. ஜிம்பாப்வே அணி சார்பில் அதிகபட்சமாக கிரேக் எர்வின் 39, தஃபட்ஸ்வா சிகா 30 ரன்கள் அடித்தனர். நியூசிலாந்து அணி சார்பில் மேட் ஹென்றி 6, நாதன் ஸ்மித் 3 விக்கெட்களை வீழ்த்தினர்.
டெவோன் கான்வே அபாரம்:
இதனையடுத்து களமிறங்கிய நியூசிலாந்து அணிக்கு வில் யங் - டெவோன் கான்வே இணை தொடக்கம் கொடுத்தது. முதல் நாள் ஆட்டநேர முடிவில், நியூசிலாந்து அணி 26 ஓவர்களில் விக்கெட் இழப்பின்றி 92 ரன்கள் அடித்துள்ளது. வில் யங் 41* ரன்கள், டெவோன் கான்வே 51* ரன்களுடன் களத்தில் இருந்தனர். இந்நிலையில், 2ஆம் நாள் ஆட்டம் தொடங்கியது. வில் யங் 41 ரன்னில் அவவுட்டானார். அடுத்து வந்த ஹென்றி நிக்கோல்ஸ் 34, ரச்சின் ரவீந்திரா 2 ரன்னிலும் நடையை கட்டினர். 2ஆம் நாள் மதிய உணவு இடைவேளை வரை நியூசிலாந்து அணி 3 விக்கெட்களை இழந்து 174 ரன்கள் அடித்துள்ளது. டெவோன் கான்வே 87* ரன்கள், டேரில் மிட்செல் 9* ரன்னிலும் களத்தில் உள்ளனர்.
ஜிம்பாப்வே (பிளேயிங் லெவன்):
பிரையன் பென்னட், பென் குர்ரான், நிக் வெல்ச், சீன் வில்லியம்ஸ், கிரேக் எர்வின் (கேப்டன்), சிக்கந்தர் ராசா, தஃபட்ஸ்வா சிகா, நியூமன் நியாம்ஹுரி, வின்சென்ட் மசெகேசா, பிளெஸ்ஸிங் முசரபானி, தனகா சிவாங்கா.
நியூசிலாந்து (பிளேயிங் லெவன்):
டெவோன் கான்வே, வில் யங், ஹென்றி நிக்கோல்ஸ், ரச்சின் ரவீந்திரா, டேரில் மிட்செல், டாம் ப்ளூன்டெல், மைக்கேல் பிரேஸ்வெல், மிட்செல் சான்ட்னர் (கேப்டன்), நாதன் ஸ்மித், மாட் ஹென்றி, வில்லியம் ஓரூர்கே.